Our wedding receiption 澳洲婚禮晚宴

因為唔係香港擺酒轉為澳洲擺, 本來條數計出來應該係慳D...但最後都係使多有突...再加上2邊父母同親人都遠道而來....真係幾溶...不過都係果句, 一世人一次...值既...!!! 以下仲會有好多WOW友之前問開我淘返來既晚裝, 都可以參考一下我真人著上身既效果..

場地主題為"夢幻豬PARTY", 光搜羅所有既豬裝飾都用左我半年時間, 當天佈置亦係我親自指揮

呢套係迎賓戰衣...有點鬆, 後面係幫帶設計..

伴娘的晚宴戰衣, 變為白色短裙..

進場的齊地婚紗....十分十分的閃....

我靚爆鏡既媽咪....

仲有6299...我老爺個樣超喜感...

因為時間關係, 黃色禮服唔夠時間換, 直接就跳到敬酒紅禮服...

質量唔錯的, 但係個胸位比較高, 我要"撥"對胸上去先就到腰位...加上肥少少後面交叉位會爆肉, 所以加左條披紗上陣...

感謝我的一班好同事...全老師班都佔左我2張台...$160澳元一位都唔少野...

My wedding ceremony

自從上年2012年變為楊太太前的4個月, 就已經忙到顛左, 根本冇時間再打任何的BLOG...

婚禮十分順利, 今天我還已經快將為人母...時間真係快到轉個頭就唔記得, 係生產前仲有少少時間, 記低返呢一年既事, 雖然唔完全, 但都係一種紀念, 人地話大肚女人最善忘, 我而家講完1分鐘就唔記得...WAKAKAKA

先講返我既婚禮, 2012年12月30日...

呢日真係大整古..本來話幫我做大妗既朋友突然一句同老公吵左唔來, 攪到我伴娘成晚唔訓要背哂D口訣, 真係要多謝佢, 如果唔係, 接新娘呢PART一定失色不了..

出嫁既女人, 父母一定係最感慨, 當時見到要準備喊既爸爸, 差點個妝不保...

雖然出嫁於澳洲, 但接新娘玩新郎是絕對不能少的!

感謝一班兄弟姐妹晨咁早就要來幫手, 冇左你地, 成個婚禮完全唔係呢回事..

我的一對小花仔花女...衣服訂自淘寶, 質量唔差架, 仲多謝我的好姐妹雪后親手做的花環同手籃...同場仲有迷你版花女...

所有既姐妹裙伴娘裙, 兄弟禮服都係淘寶貨...要求色版訂制, 質量好而且價錢好平...

短短半小時, 我由李小姐變為了楊太太...

一個完美的婚禮, 價錢實在不菲, 不過一生人一次...值既..!!!

很快我地就成為楊爸爸楊媽媽了, 接著是結婚一週年紀念...回想當天, 還是很回味

第一次淘咁貴既野..婚紗禮服篇

作為一個海外B2B真係好鬼頭痛...特別係好似我呢D住埋D山卡拉地方既就更陰公..識我既WOW友都知道我人住澳洲我住澳洲住係黃金海岸呢D遊客多過本地人既地方, 搵件正常D既禮服都搵唔到, 咪話婚紗, 真係去到正式婚紗店租仲貴過買...買又唔知咁貴買來做咩...而且呢個鬼地方真係想搵一間唐人既WEDDING PLANNER都冇, 所以好多野真係要自己落手落腳, 最後我就當然係收集唔同WOW友既推薦"淘"婚紗啦...老實講...我一共買左一件白紗, 3件晚裝加埋都唔使$2000人仔...你話係唔係抵過係澳洲幾百蚊澳紙去租一套見得下人既婚紗好好多呢....不過呢4件野都只會係晚上RECEPTION著, 因為晚上又燈又閃咁都冇人真係好清楚一針一線咁睇你件野係唔係好野啦...都係靠燈光打落夠閃就OK啦.....而早上行Church既白紗係一間日本既wedding公司提供既, 香港都有分公司架...應該好多人都聽過WATABE啦....早上行得慢....件紗又要拖尾...都係試清楚D好....好啦~~~唔講咁多啦...去圖啦!!!

首先係我迎賓既禮服....因為比較多合照相, 所以我揀左比較多DETAIL既款

然後係好多已婚既WOW友同好多B2B都推薦既滿庭芳, 我出場既白紗好緊要, 一定要買好質數D....而為左加強氣氛, 我到時係唔會慢慢好溫純咁行出來...我係會同楊生跟住兄弟姐妹同伴娘伴郎最後跑出來的, 所以我揀左齊地款, 再加厚底布鞋....型爆!!!

本來想好呢件係送客既, 不過想想下, 又真係幾多機會俾到我送客呢....酒店係包4小時任飲酒水既...班鬼唔飲到最尾都唔走啦....加上唔係好多係家庭形, 比較多都係COUPLE, 而且我既兄弟姐妹又好鬼玩得, 一次唔"隊"死我地唔會放人...所以我將呢件轉為分享/中場/遊戲時段時著

最後就當然係敬酒+送客既禮服, 我比較傳統, 仍然覺得敬酒時係要大紅既先夠喜慶~~~

兄弟姐妹伴娘伴郎衫裙都會係"淘"回來的.....但因為仲差2位兄弟尺寸所以會準備好再BLOG出來...而花仔花女衫會係下一篇分享呢~~

緣份的感恩

最近睇到好多BLOG友講返佢地既愛情故事, 有感動的有爆笑的有溫馨的...今日好姐妹放假同我傾左一日既計..大家傾下結婚既事, 佢係我既伴娘, 會係聖誕節由香港飛來澳洲為既係睇住呢個細細個毛都未出齊既好姐妹搵到佢既MR. RIGHT長大出嫁呢一刻..仲有係要阻止我喊到包咁幫我抹眼淚, 其實由佢應承我會專登飛來澳洲陪我出嫁果一刻我已經感動到喊出來...世上除了父母係身邊外, 冇野比起由細識到大既好姐妹係你身邊陪你出嫁更感恩, 其實本來唔止佢一個, 仲有我另一個好姐妹本來會來澳洲幫我打點全個婚禮, 可惜佢要留係香港好好休息把小公主健健康康咁帶到世上, 我契女就係我出嫁既最好禮物了...所以我完全唔會唔開心因為我一直都好想佢生個契仔契女俾我, 而佢又好乖我先離開左2個月返到澳洲佢就帶俾我一個小壞消息一個大好消息....

講起我呢位伴娘, 佢既感情真係來得不容易, 雖然他倆都係我中學同學, 但係卻只有把愛收藏在心, 畢業, 分開, 各自進修, 出身社會, 緣份把他們拉到原地, 爆發了他們多年來對對方的思念, 拍拖, 同居, 旅行, 工作, 佢地有共同目標, 辛苦2年存夠首期建立一個屬於2人的家, 我這對好朋友曾經在2010年來澳洲陪伴了我半年時間, 佢地既感情, 努力真係不可小看...佢地可以住最平既地方, 做最辛苦既工, 食最平既食品, 為既都係多存一分錢快快完成夢想, 看著他們每次打鬧後在我們面前你數我我數你但眼睛發光既幸福光環我至今都仲好記得...呢D就係愛..

正題講回我同楊生既故事, 好多人唔信我地既經歷, 有些老朋友更會笑我們, 因為我地係由仇人開始的.....

話說2006年, 楊生大學畢業後來到澳洲進修MASTER, 2007年1月來到我工作的地方見工....而隔日我同前男友搬到公司附近當時我同我妹妹2個女人搬部29吋舊式大牛電視上3樓....由的士搬到地下已經想死....剛好見到楊生踩單車經過返另一份工我就停住佢問佢可唔可以幫我搬上一級...其實佢想幫我搬上樓, 但唔知點解我叫佢幫我搬入大門口就叫佢走, 之後梗係2個女人自己搬上樓啦...當這是第一印象...

第2個星期佢正式返工, 當時我係supervisor, 經理安排我帶佢, 而我就用當時唔咸唔淡既普通話教佢, 佢突然轉頭問我邊度來...我話"香港人!點呀!"...佢講左句:"唔怪得你普通話差成咁..."....我真係嬲到呢...!!!!!!!激嬲我佢梗係冇好日子過, 我除左唔過佢古惑野仲成日督佢背脊..就係咁我好憎佢, 我鬧佢佢就笑...仲成日講野激我...我就日日想新野鬧佢...由賤人, 醜樣, 怪人, 白痴咩都鬧過佢都冇反應.....與此同時, 我當時其實係讀梗大學仲要日日打工係因為當時我認為要嫁既男人好好賭, 我就迫住出來狂打工幫佢還債....

2007年10月, 佢因為唔想再同homestay住...就搬左去我好朋友既share house, 我好朋友上海妹成日覺得我好可憐所以佢出去會帶埋我有時煮埋飯我食怕我唔煲湯煮飯食..當時因為楊生剛剛買左車, 我好朋友會要求自己唔得閒時叫楊生車我去買送怕帶我去佢屋企食飯咁...咁我地就開始熟絡啦...終於有一次我地晚上收工一齊食宵野時我同佢傾心事講起我個ex點對我...佢突然個樣好似晴天霹靂咁....自從果日之後楊生開始成日短信我食左飯未, 休息未...功課識唔識咁.....其實當時我都心大心細覺得佢好似對我好好, 我想走但唔捨得走...我開始試探佢...係大學第2年既學期尾我有2份大assignment要交...因為佢英文比我好所以我請求佢幫我對下...係佢送我返屋企時佢突然同我講, "Selina<--(我好朋友)叫我唔好破壞你家庭..."..我就即刻問佢...下??你講咩!?第一我未嫁我未有家庭, 第二, 你又唔係鍾意我點解你會破壞我家庭?? 佢終於講如果佢唔鍾意我點會對我不離不棄任何時間都係我身邊....話說當時我ex實在欠下巨款, 我實在還唔到, 我只好求楊生借住俾我, 但係ex知道後唔感激仲打蛇隨棍上再私下借多1000蚊....後來我同楊生其實未一齊但係我開始想走既心...終於到左11月楊生24歲生日前一晚佢放工後來找我問我聽日可唔可以陪佢食飯因為係佢第一個有我既生日, 我當時就答佢唔可以喎, 因為我聽日有更重要既事做真係唔可以對唔住...佢問我有咩比佢更緊要, 我話真係好緊要架...佢就好唔開心咁走左....其實我一早已經有想法...

2007年11月19日, 一早我返公司因為前一晚pest control所以我要7點半返去汁檔唔係9點開唔到門...但當日我已經請左假, 不過老闆求我返個早上幫手我就ok啦....但係前一晚其實我已經整好左個蛋糕到4點先訓....當攪掂哂公司既野後我就飛的去到楊生既大學搵到佢架車, 捧住個蛋糕等佢, 我打電話同佢講生日快樂, 同佢sorry有事佢日陪佢唔到, 但係如果佢晚上有活動叫佢打俾我可能我既事做完可以陪佢地晚飯咁...佢話好啦咁..佢而家落堂返屋企...正當佢行下行下行到車到時望到我企係度手拿住個蛋糕佢即場喊左出來...後來我地晚上一班朋友陪佢慶祝後佢要求我唔好再返去我ex既身邊, 佢會好好咁珍惜我, 愛我, 將最好既俾哂我....我考慮左好耐, 第2日早上我就同ex講我地分手吧, 我已經覺得好累, 我先21歲我唔想日日咁樣幫你還錢還錢日日係公司過, 我想有朋友, 我想有人錫, 我想......佢跪低求我唔好走...佢應承我介賭, 果下唔知點解我個心會覺得我唔捨得佢, 我覺得佢咩都靠我如果我一走佢真係會唔掂.....等佢返左工後我打俾楊生同佢講我唔走啦我唔捨得個ex...我估唔到係平時15分鐘既路楊生5分鐘出現我面前跪係度喊, 佢話我仲後生, 唔值得為呢種人咁樣過我既生活, 佢可以俾最好既我, 佢知道我愛佢的, 佢多次求我走...我果下覺得真係唔走唔得....恨就恨啦....我好快咁汁哂行李就離開了本來既"家".....

楊生並冇呃我, 佢唔有錢但佢真係俾最好既我, 所謂最好係佢搵10蚊會俾夠11蚊我, 果1蚊係tips....咁多年來就算再難過佢從未俾我捱過苦或鬧過我半句...佢總是窮自己富我, 把我本來由一個咩都為人去想辛苦自己既人寵壞我成一個係屋企跳叫喊扭既小公主..想當年22歲的我幾咁瘦幾青春....

楊生帶給我的不是什麼金錢驚喜, 但這5年來佢堅守承諾給我最好把我當小公主般疼錫, 所以我好多老朋友經常笑我想當時咁憎佢....而家一講起佢雙眼發哂光咁...

呢5年我地經歷過大吵, 移民政策差點要分隔2地, 最窮最辛苦既日子, 冷淡期, 我們上年因為過大禮問題同家長問題差點結唔到婚, 可能因為經歷過我會成日好感恩, 呢半年來我不停聽婚禮歌, VIDEO BG歌, 睇人地佈置, 行禮VIDEO總之好多關於WEDDING既野啦...我會好易想起我地得來不容易既婚姻, 好感恩最後2邊父母都因為愛我地而接受, 好感恩楊生一直對我不離不棄, 我會冇啦啦坐係度聽聽下睇睇下哇一聲喊出來喊得好悽涼咁樣....個人變得好感觸同神經質...

係呢一年入面我睇到好多野, 對眼可以睇到好多面, 好多時你睇到既唔一定係肉眼所見, 佢唔會驚喜, 但絕唔會令你驚; 佢唔會用甜言蜜語哄你, 但佢一定唔會去呃你; 佢唔係下下報到講你知每分鐘做梗咩既人, 但只要你少條頭髮佢會即刻出現你面前同傷害你既人死過..!! 佢好為食咩都想食哂佢...但佢會留返你最鍾意同最想食果份俾你; 佢會好惡死叫你咁樣咁樣, 但係只要你嗲佢2句佢命都可以俾埋你....呢D事人地唔會睇得到, 但係作為佢既另一半我唔止睇到而且感受到....一段婚姻真係唔係人地睇你愛我我愛你就一齊咁簡單, 雙方家庭要接受兩家變成一家你變成佢半邊女或你變成佢半邊仔真係唔係一件易事有好多關卡, 但亦因為咁, 我地更感恩上天俾我地既緣份同考驗, 更珍惜我地既感情同婚姻來得不容易...

幸福的人, 無論是你或你的好朋友, 只要在分享屬於你倆的故事點滴時, 可以從眼神中知道幸福與否, 當你們想想在互相頂撞時你是否真心是如此想法呢? 真正的幸福同充滿愛的人當提及另一半時雙眼會閃, 真的, 因為有期望有期待, 那一種光, 不是普通人可以看得到的....你, 找到你的幸福了嘛?

我的未來奶奶。。

呢2個星期都忙到顛, 根本就冇時間坐低打BLOG, 更唔好話打台中遊...成堆心理學報告, 觀察報告, 政府報告....等等等住我交出...我想死都要請假, 但我今日真係好想記低下我既未來奶奶..

 

其實, 自我同MR.Y走埋一齊, 我的未來奶奶已經好好, 由開頭半年仲覺得我係一個搶佢仔既壞女人, 成日打電話問MR.Y我對佢好唔好, 問哂我既資料外, 係之頭既半年開始, 佢就已經當我女咁既錫, 我唔敢講係唔係比我媽咪更錫我, 但一定有我媽咪咁錫我....由我同MR.Y一齊住開始, 佢就會得閒打俾我問下我身體, 問下我有冇足夠休息, 問下我佢個仔有冇蝦我....仲記得當時我地都住得遠, 一向我返大學都係坐巴士既, 因為門口有巴士直到大學, 如果MR.Y有時間就會接我放學, 直到後來租約滿左, 我地要搬到更遠, 如果我要坐巴士係要轉2次車既, MR.Y覺得我一早爬起身仲要轉2次車好慘, 本來想換車既佢, 同未來奶奶講不如買部車俾我代步返學啦...咁我唔使日日都咁早爬起身仲要咩住部LAP TOP返學, 當奶奶一口就答應時我已經好感動......於是後來既一星期我地周圍睇下有冇平既2手車....我新牌仔平平地就算啦....當有結論後我地同未來奶奶商諒...佢想想下竟然話都係唔好, 話哂我第一次開車新牌仔, 2手車又唔知有冇人改過, 佢都係寄多D錢俾我地叫MR.Y買部新車俾我....當時我即刻喊出來...

 

我同MR.Y既第一年, 剛好我媽咪身體出事要入院要做手術, 而我又係大學最後一個學期畢業考, 我剛剛先從香港飛返澳洲就收到爸爸話我知媽咪要做手術既消息, 我真係好驚, 好驚媽咪會有事, 佢又唔準我返去要我一定考完個試畢業俾佢睇, 未來奶奶打俾我問我媽咪係邊間醫院, 我只係提左一次, 佢竟然續間醫院問要幫我照顧媽咪...

 

及後我畢業頭半年都搵唔到岩既工作, 而MR.Y又要完成第2個MASTER最後學期, 係冇收入下奶奶一直幫我地俾屋租..

等MR.Y畢業後, 我亦有工作, 我地開始完全唔再靠家人仲可以俾返家用....

 

2010年...第一次到南京見MR.Y全家人同宣佈訂婚, 所有既長輩都來見我呢個長孫新抱....未來奶奶係旁邊陪住我等我唔使驚, MR.Y當佢最好兄弟既伴郎, 未來奶奶送我去飲晚宴時車上叮囑我如果佢地玩伴郎伴娘可能會好過火, 叫我千萬唔好唔開心, 因為佢個仔只愛我一個.......佢教識我好多夫妻相處之道, 係我離開南京返香港時, 佢係機場攬住我唔捨得而喊....

 

2011年5月我同MR.Y成功入籍澳洲, 未來奶奶比任何人都開心, 然後準備所有野....11月, 我地返香港雙方家長見面, 未來奶奶唔想失禮, 帶了2大箱手信同貴野送俾我父母作見面禮....返到南京後不停讚揚我父母..

 

2012年1月, MR.Y的爺爺過身了, 未來奶奶知道我一定會傷心, 雖然我未嫁入楊家...但佢打電話安慰我唔好喊, 叫我唔好傷心...2月, 我同MR.Y終於擁有我地第一個物業, 呢間屋好珍貴, 除了我地4年既努力, 仲有未來奶奶既努力, 冇佢冇我地既將來...5月, 即係呢個月, 所有野都安頓好準備訂家私, 可愛既未來奶奶係都要我地用佢信用卡...已經話唔使..佢一定要係QQ度講哂佢既DETAIL俾我地知...俾我地話佢咁樣好唔安全...佢又嚇到係咁問我點算...我地只好安慰佢, 可以DEL既...唔使擔心....當時佢話唔使怕...我去改密碼, 昨晚我收到佢又係QQ SEND新密碼我知, 一睇竟然係用了我同MR.Y既生日....她是如此的重視我.....昨晚佢留言給我寄左包裹俾我, 我問佢點解唔等所有野先寄...佢話怕我等想我快D收到, 但係過重要分2個包裹, 我問佢咁樣咪要俾2次首重唔抵囉.....佢只回左我一句....正是令我今日想打呢篇BLOG既原因 : "我省著點沒關係, 只要你們收到開心, 就是我的滿足"....

 

我的未來奶奶是如此的愛我們, 不只是她的兒子, 還有我....她是一個我們香港人很討厭的"大陸人", 但她不是蝗蟲, 她自小就教育MR.Y要自力更新, 要勇敢, 要珍惜....她從來不在孩子面前跟丈夫吵架, 只會慢慢地說著道理, 但她不是一個農村長大的, 沒有接受教育的女人, 她是一個接受高等教育的會計師, 一個比很多人都強, 手上負責的公司都是以BILLION開頭的上市公司, 但是卻對她的丈夫, 兒子及我這個未來媳婦如此的溫柔, 無微不至....她是我的未來奶奶, 我的家人, 我會在12月尾改口為媽媽的人.....