奶癬?濕疹? Baby eczema??

呢個星期打扙一樣, 話說比比出世時某D位置都有小小一點點紅, 但係唔嚴重, 上網一查大多媽咪都話係奶癬, 據統計，約有一至兩成嬰幼兒有機會患上奶癬，這會令他們的皮膚發紅、乾燥，並感到痕癢, 奶癬屬於小兒濕疹的一種，是嬰兒時期常見的一種皮膚病，本身並無傳染性，雖然名稱中有「奶」字，但奶類敏感不是奶癬的唯一成因。兒科專科醫生陳善珩指出，奶癬主要成因暫時仍然不明，可能由於嬰兒對食物、環境等因素出現敏感而引致，奶癬會令皮膚出現淡紅或紅色的斑點、摸起來有些粗糙，更會出現痕癢現象，多集中在面、頸、下巴位置，並常出現於1歲以下的嬰兒。

星期一我地一家因為99係都話要出去行同買送既關係, 我地出去位於BRISBANE比較偏既越南區INALA買新鮮肉同海鮮, 去得越南區就梗係要食碗越南牛肉粉啦, 我陀住比比時都成日食牛肉牛扒, 所以應該問題不大吧.....晚上同比比玩時, 發現佢出左少少紅色粒粒, 當晚我就叫左99用金銀花幫比比沖涼...

 <-----比比既左邊面仔已經有一撻紅色

星期二既時候, 都維持差不多樣子, 下午99再用金銀花幫比比抹面...(老實講我覺得佢係用返昨晚既金銀花加熱水)....

星期三, 我同比爸要出門攪寶寶准貼事項出門, 比比就留係屋企由6299照顧, 下午返來食左碗老爺煮既勁咸蘑菇炸醬面...黃昏餵完奶後比比既面開始惡化, 出水同成面都係一粒粒, 做媽咪既梗係緊張啦, 我即刻話睇醫生, 比爸仲係咁講"冇事冇事既..."...99又好似事不關己咁, 62仲叫我唔好再望住比比, 等99照顧, 然後我望住當晚既晚餐, 炭燒雞亦, 炭燒羊腰, 咸酸菜肉片湯, 唯一我食得既就係一碟勁咸既蕃薯葉, 到底你地有冇想過我架, 我坐梗月仲要餵人奶, 你地2老錫個仔做大魚大肉重口味俾個仔食姐, 你都唔好咁害我同個孫呀, 我食白飯食到一半忍唔住大喊出來衝入車房, 我先係10月懷胎辛苦生個女出來果個, 你地梗係冇感覺啦, 有邊個及得我咁心痛呀!!!比爸見到我咁就決定左第2日即去睇醫生....而且當晚得好多好媽媽會既媽媽意見...一定要睇醫生!!

<---當晚比比塊面...有邊個唔心痛呀!!睇住佢不停因為痕又R唔到而喊...當晚只有係沖涼時佢係舒服的...

星期4一早我5點幾就起身, 實在係擔心一直望住比比塊面...而且耳仔仲不停出黃色水流到成張床墊仔都係...一到8點我即刻打電話BOOKING醫生, 約好9:30就起身餵奶換片準備出發...見完醫生, 醫生問我係唔係有濕疹, 我先想起婆婆話我細個一出世就成身都係, 而且我而家咁大個有時都會發出一點點, 醫生即話係遺傳的, 好多BB都有, 佢係BB濕疹Baby eczema, 叫我唔使擔心, 開左支藥膏叫我早晚揸

另外時間就用QV CREAM保濕...

係下午時已經好左好多...

 

真係病在女身痛在媽心...坐唔安訓唔落...

持續1日1夜既保濕同清潔, 比比星期5既皮膚都冇咁多一粒粒啦...

今早起身耳仔已經冇出水啦...但就係咁甩皮, 同下巴鼻仔下都係...但明顯佢已經唔痕, 而家只要佢訓覺, 我就會包實佢, 佢對手郁唔到就會好訓好多...

比比, 你要快點好返變返媽咪既白滑妹妹呀...見到你咁媽咪心痛死啦...真係唔做過媽咪都唔知自己小朋友病係可以心痛成咁, 終於體會到細個入醫院時媽咪擔心到喊既心情...為了給你最後幾天最好的母乳，餐餐青菜+2碗白飯狂飲水，雖然只夠你每餐的1/5，但作為媽咪已經盡力了...你要快快好起來呀!!!

窮媽媽心聲

已經做左人地媽咪快2星期了...呢2星期話快唔快話慢唔慢, 望住比比成長真係又驚又喜...

由係醫院的第一日, 應該話係我陀住比比既就已經決定左要全母乳, 所以由比比出世開始我就以埋身方式餵哺, 當自己的小寶貝貼住自己心口一吸一吸地滿足肚子既需求, 同樣地做媽咪既都得到最大既滿足, 因為呢個時間只屬於我地2個, 冇人可以代替...只有我先可以提供到俾我既小寶貝屬於佢享受既母乳....

可惜, 好境不常, 係DAY 2時比比唔再係第一日剛出世食少少就夠既BB, 佢邊吸邊發難, 每次仲要吸成個鍾, 就算係姿勢對都會破損, 更何況我姿勢唔同, 一次又一次咁忍痛俾佢吸吮, 最後我冇辦法接鐘仔搵助產士來, 換來既係: "係咁架, DAY 2係好瘋狂架, 基本上係24小時埋住身餵架..." 但呢位小朋友好明顯係一D都唔飽, 佢吸吸下會發難, 會"就"眉頭, 個樣可憐到不得了...我又點忍心呢...再一次呼叫, 又再一次呼叫....係最後一次呼叫時係因為我已經被吸出血泡, 即係乳頭破損但血未流出既狀態, 已經不能再餵, 而我用手擠亦一滴都冇...護士解釋因為我生完比比後冇左成1000 CC既血, 人咁虛弱, 邊度仲有體力做奶, 亞洲女性普遍係3-4日先會上奶, 我仲要更耐...于是乎助產士推左部Hospital grade既Medela入來叫我試泵....可惜結果都係成個鍾一滴都冇...呢個情況下, 我簽好左紙同意醫院提供奶粉, 比比終於都食得飽有返個滿足樣啦....

DAY 3出院前助產士俾多4支即食奶粉俾我帶返屋企怕我買唔切, 所以出院返到屋企後, 我試過埋身失敗後就只好俾奶粉了...心情真係好難過..晚上比比一扭餓, 我即埋身, 換來係佢更可憐既樣子, 果個樣子我到今日都仲記得...晚上我成晚唔訓試手擠, 總算有幾滴..

DAY 4, 助產士來家探訪, 知道我埋唔到身, 而且比比因為食唔夠黃疸上升, 可能要入院, 果下我真係心情趺到落谷底...助產士教我用欖球式餵...有佢睇住姿勢, 我第一次見到比比埋身有咁滿足既樣..佢仲教我點泵奶, 助產士話再觀察, 如果聽日黃疸唔下降就要入院, 佢聽日再來, 佢離開後的2小時, 比比再次要求進食, 我按助產士既方法俾比比埋身, 可惜...失敗了...真心抑鬱, 我上房喊...大喊...自問自己係一個幼教, 湊小朋友我真係無難道, 但我今日連餵飽自己個女都做唔到...我覺得個女好煩, 好憎佢, 成日喊, 好討厭, 我同比爸講我唔想要比比, 我覺得佢日叫夜叫, 我冇哂自由冇哂自己, 日日都係餵餵餵....痛痛痛...比爸同我解釋左好耐奶粉既好處, 勸我冇辦法就俾粉, 唔好攪到連自己健康都唔要, 自己都冇休息冇訓過, 又何來精神照顧比比....下刪1000字....心情係好少少, 但因為99成日問點解冇奶, 又叫我試下埋身, 唔知點解, 我唔敢, 唔想, 好抗拒....佢不停地話叫我食咩食咩...令我更抗拒餵奶呢樣野...

DAY 5, 一早起身試泵, 得果20ML, 1/3餐都唔夠...我又再次exhausted...再試餵失敗後再聽到99叫我試, 我終於忍唔住係佢面前喊...佢一見我喊就叫我唔好再俾自己咁大壓力...下午1點鐘, 助產士來到一見我個樣勁心痛...勸我放棄, 佢解釋得好好, 呢個世界上唔係人人都做到母乳餵哺, 否則都唔需要有奶粉去代替, 如果自己既心理健康受破壞, 亦唔會產出好質量既奶, 不如俾奶粉, 自己多休息, 話唔定慢慢會好過來, 就算係全奶粉都唔代表佢會唔健康, 好媽媽係由心理健康形成, 非母乳餵哺唔代表我不是一位好媽媽, 一個小朋友身心健康與否不是因為那半年至一年的母乳餵哺, 而是日後提供不同營養與後天的教育...我今日就算轉全奶粉, 我亦會是一位好媽媽....我聽完後喊到痴左線咁....佢立即給我一個支持的擁抱, 就係咁, 我放棄了埋身人奶媽的路, 改為2溝媽之路...何為2溝, 即是泵出人奶加奶粉一起餵哺, 自呢日起, 比比食得飽訓得香甜, 冇再亂喊, 我得到應該有既休息, 奶量慢慢上升, 比比其實真係好好湊, 佢只有餓先會扭, 只要你俾佢食飽, 佢一定唔會同你死過, 而且仲好多表情哄你笑....我個女咁得意, 我點會有想唔要佢既念頭!!!! 荷爾蒙你快D走呀!!!

今日是DAY 13, 睇住每日增加既奶量, 我要更努力, 希望做唔到埋身媽都成功做到一位泵媽, 雖然我只想堅持一個月的最低要求...因為本人身體唔好, 中度貧血加白血球低, 經常會病...而病時又唔可以俾人奶, 所以捱到1個月已經要為自己慶祝!!! 我是一位窮媽媽, 不像富媽媽一樣一天1000ML以上, 仲有多多冰奶雪奶, 我只有手停口停餐餐清, 但我都會給我女兒最好的...不只是奶, 是所有..

看看我的努力~~~~~~

再睇睇比比既古靈精怪樣....

新鮮出爐小羊比【下】

到達左醫院後, 立即就被安排左入產房, 上次產前班有參觀過都知設備齊全非常之正..

終於都正式地享用, 5PM開始吊催產藥同邊駁機測宮縮, 一齊其實有點突然我自己又開始心跳加速, 助產士先幫我插針入手, 以後既所有打入體入既藥同吊水都係通過呢個管入..

助產士幫我換好醫院衫後就開始幫我按下胎位, 紀錄下我既心跳同血壓等, 我就同比爸傾下計, 大約7PM開始有規律陣痛, 助產幫我檢查宮口, 真係堅痛, 佢攪下攪下話先開左1度....1度!!!!平均每10分鐘一次每次30秒, 後來先知道原來催生冇野食..我真係好餓先要求到一份三文治, 8:00PM我食三文治時陣痛加快到3分鐘一次, 我已經係一痛就停口, 快快食完後我就落床企, 感覺上會冇咁痛...坐下FIT BALL, 但我覺得坐凳上仲冇咁痛, 當時比爸望住我已經勁心痛, 不停同我按摩全身同頭, 係我顛下顛下時我已經企唔穩走返上床, 開始要求笑氣, 老實講, 係床上真係會痛過企好多, 但係冇計我已經冇力, 痛足咁耐仲未生得...我一痛就吸笑氣, 狂吸, 9PM已經成個人顛左咁, 痛到覺得自己落左地獄真係唔好講笑, 笑氣已經最大度數, 我個人已經WING下WING下咩都唔知, 一痛到底時又唔敢大叫, 只好小聲叫, 終於捱到10:45PM助產士再幫我CHECK宮口, 點知!!!痛成咁先開左2度...唔係嘛!!!!我真係頂唔順囉, 由頭到尾我都好堅決唔打無痛, 因為聽幾多媽咪話打完有SIDE EFFECT, 會腰痛之類, 但仲點頂呀而家, 我立即要求Epidural, 助產士見我個死樣都知我真係顛哂立即call醫生來, 醫生亦係5分鐘就來到準備, 同我交代哂所有野, 老實講, 呢個時候我仲要聞埋笑氣個人wing成咁, 叫我同比爸講中文都有難道啦, 仲要我專心聽同講英文真係痴銀線囉..!!! 交代完後醫生就立即準備, 我要坐起身平衡身體等醫生可以將無痛打入背脊椎, 呢個時候再痛我都冇反應, 因為遠遠唔及我陣痛勁...陣痛已經去到1分鐘一次, 醫生只可以係中間我唔痛時先可以做野, 所以我一唔痛就要出聲, 終於係11:45pm時攪掂, 個人麻醉左...背脊插住無痛藥, 靠呢部野控制

然後個人係12:00am開始就昏昏沈沈咁訓著左...中間既陣痛老實講同原先已經小巫見大巫啦...所以比爸見我訓左佢都訓一陣...大約4:30am我就醒醒地, 中間時間助產士一路幫我check住心跳同血壓, 4:45am再一次check宮口時間, 今次唔再係幾多小度, 而係開哂啦!!!開哂啦!!!之後就安排醫生來準備pushing啦...但都要準備一個鍾, 呢一個鍾其實比起之前既陣痛真係唔算係咩, 我仲可以同比爸講笑...等到醫生5:45am來到, 就準備好哂, 比爸要幫手托住我大脾, 而我要等每一次陣痛來先可以用力, 陣痛一來, 助產士就不停you can do it! I see the head! keep going keep going! more! lots of hair.....等等...然後, 終於最後一推, 6:30am比比正式出世..

係呢個moment, 我係即喊左出來, 本來好warm既場面....胎盤出來後突然助產士大叫我大出血, 而我本來係抱住比比慢慢失去意識, 比比立即被交俾比爸, 只知好多人走來走去, 係咁止血之類, 我聽到聲, 但冇反應, 因為失血同不停打藥入身體我全個身不停咁震, 係好辛苦控制唔到既震...然後我突然就嘔到成床都係...就暈左....當我醒返時已經8:45am, 有人幫我清潔梗身體, 而比比亦係我昏迷時由比爸護送左去做所有既檢查..

以上既相由比爸提供...等清潔好後9:30am我就被推上待病房等分配, 然後比比就推到我身邊啦, 呢個時候我先真正望清楚比比係咩樣...邊食早餐邊餵比比, 呢個moment我真係冇想過突然就來到...然後比爸就一路抱住比比同學習換片片...

等到我午餐時, 比爸就去左接6299來睇我....

然後我就被分到一間單人房, 有人推我去...真係嘆...相比我等上房時右邊既媽媽由陣痛到生左都只係用左半小時, 佢係用輪椅推住行only...

新既醫院真係好正, 單人房既設備應有盡有...

就係咁, 我就係呢間房渡過左2個晚上, 而比爸亦陪住我2個晚上...

今日比比已經DAY 6小人仔啦...時間過真係好快...上星期既今天, 就係我的破水日...

~~~~~~~~~~~~~~

新鮮出爐小羊比【上】

小羊比比已經係今個月3號即係剛剛過去既星期日出左世啦, 過程真係只能用艱辛來形容...10月31日預產期當晚, 爺爺仲話如果你今晚唔出來, 咁就等聽日爺爺做埋梅菜扣肉先出來啦, 唔係你媽咪坐月就唔食得架啦~~真風趣的爺爺...

11月1日星期5, 因為已經到左預產期, 所以比爸一早同老闆請左假陪我待產, 奈何小比姐一直過期居留唔肯出來, 比爸為左令我心情好D, 所以答應左帶我出去食返餐魚生飯, 我當然就好興高采烈, 難得老公星期5唔使返工陪住我, 仲有魚生飯食...我地同埋6299一家4口出發, 可惜好景不常, 其實我都預左, 只係冇想到真係中姐...澳洲GC每年都會係10月尾攪場嘈死人既賽車比賽, 為期3日, 呢個時候我最愛既日本餐廳有性格既老闆會籍呢個機會返日本入貨2星期唔開門, 所以, 當然我地摸門釘了..最後只好迫於無奈轉左食一碗我個人覺得唔值$10澳元既拉面...

既然唔係食我想食既野, 咁當然唔會滿足啦, 所以比爸終於批准左我食呢10個月未食過既FROZEN YOHURT!!!

食完滿足啦...又係散步時間, 為了加速宮頸成熟打開, 我每日都要行路, 行得愈多愈快..所以每晚晚飯後爸爸都會陪我係屋企大園圍住散步, 而今日我地大白天就去沙灘漫步下..

返到家中再食多碟西瓜, 晚上食過爺爺的扣肉後突然覺得好累, 就上樓休息, 然後破天荒地9:30PM就訓左...呢點比爸認為係先兆...到左零晨2:40, 訓訓下突然覺得有D野係下面流出, 意識下我當然立即摸下係唔係見紅順便叫左聲老公下句都未講完...手都未摸到就一股暖流傾瀉出來成床都係我立即企起身跑入廁所大叫穿水...然後個人唔知點解仲呆呆下坐係廁所小便完用廁紙索...再企係度用毛巾索....難道我覺得可以索到??突然個人醒哂即刻用大巾墊好著好衫望清楚完全紅都見埋...今次仲唔快快生!!!比爸非常心急打去醫院通知產房先, 然後我換好衫叫醒埋99就出發醫院去....3:10AM去到醫院時水又多到湧出來流到成地都係即要入廁所換過片巾...然後出來就被安排坐低問下情況...駁心跳宮縮機等觀察宮縮情況

說好的觀察20分鐘, 同時間我對面係一個同我一齊來既孕婦, 我2:40穿水佢2:50, 但係佢就不停地"唉...."明顯係宮縮好痛, 聽到佢話8-10分鐘一次, 但係我係完全冇FEEL囉, 點少少痛都冇...想點...唔係穿左水就好快生既咩?? 由3:10AM等到6:48AM, 聽到有人同對面女人講今日醫院好爆, 點點點, 然後就聽到個女人走了....噢...走了...然後我就開始食一份勁難食既早餐

果塊面包係凍硬既, 而麥片係冇味既, 所以最後我只飲左支奶, 而聰明既比爸竟然帶左出前一丁來焗俾我食呀!!!! 最後我地一人一半食完, 就有個助產士來同我講今日醫院好爆, 我穿左水必須要催生, 但係問題係醫院一小時只可以做到3個產婦, 而當日有14人係度等, 所以佢建議我返屋企等醫院電話通知我返去催生或當然如果我可以自己開宮頸就最好可以直接到醫院去....所以, 8:00AM係不可思議穿水都要出院下我地又返左屋企等..等運到...中間有少少不規律宮縮但唔算大..等到11:30AM比爸出去買埋SUSHI過我食....亞女, 你食唔到魚生飯, 食壽司頂住先啦

一個下午, 比爸都係度睇穿水後會點點點, 自己行來行去, 又怕呢樣果樣, 最後我同佢講你打電話返醫院話bb唔郁, 而且我見痛, 睇下佢會唔會早d俾到時間我...點知人地叫佢等多1個鍾....呢個緊張爸爸開始亂哂, 又話不如直接去...等等等到3:40, 終於都有人打俾我叫我返醫院催生仲要半小時去到....我地立即收拾好野出發到醫院!!