第一次跌落床⋯

2014年2月23日，對我來說從未曾感到如此驚慌，這天比爸放假，我地陪小公主去公園散步，比比第一次去公園見到咁多花花草草異常興奮同開心～

晚上累透了的小公主，平日6-7點後我同佢會同床訓，等佢訓著我會去執屋及準備晚飯材料以備比爸放工回來後立即可以煮，今天亦一樣，只係今晚係比爸煮，所以當比比訓著後我就走到書房工作，因為比比已經會翻身，從躺變趴，一般佢只要自己訓訓下翻成趴就會大叫我幫佢轉返，所以我都好放心⋯

冇想到既係，我在書房工作時，比爸在樓下打遊戲，突然係完全冇防避下Boom一聲連隨爆喊聲音，我心中突然出現死了的字眼立即衝入房只見比比成個人趴係地上，可幸係我房係木地板比較軟，如果換著像樓下是𥖁地，我想已經兇多吉少⋯我倆既心當堂實左，立即抱起佢然後我都心疼爆喊，作為幼兒導師的我，平時返工會好注意安全事事以防萬一，點解我對自己女兒會如此不小心！

可幸是她只係撞紅了額頭，喊了大約5分鐘就收聲飲奶了⋯媽咪爹地先放下心頭大石，但都成晚訓唔到觀察住佢每小時既狀況⋯

第二日為了一萬，我帶埋比比跟爸爸返工，好彩小跳皮還識玩識叫識笑零呆濟⋯如果唔係媽咪真係唔知點算啦！

100日小公主～

時間真係飛快，仲係度懷念梗大肚時摸住個肚感受胎動既日子，小人兒已經100日大，係過去既100日真係有開心有流淚，有時候會想自己好似仲未ready做左人媽咪，但有時候會想我做足哂功課，做呢個媽咪no problem啦！

但點都好，米已經成炊～小人兒比比一天一天長大是個不爭的事實，但願我的小可愛每日都咁開心咁健康，帶給我地全家更多的快樂！

媽咪愛你喔！❤️

3個月袋鼠國小羊比

遲到好過冇到, 係呢度先同大家講聲恭喜發財, 祝大家新的一年行大運, 未有伴侶的很大遇到你的MR./MISS.RIGHT, 準新人愈來愈甜蜜, 事事順利, 已婚的家庭和順早生貴子..已懷孕的寶寶健康成長出世, 已當父母的寶寶快高長大活潑健康...最後都係果句, 心想事成!!

真係估唔到, 話咁快比比就已經3個月大, 想返起上年呢個時候應該係我剛剛收拾了小產心情, 然後再次懷孕既時候, 今日小人兒已經咁大隻...想都想唔到佢剛剛3個月已經會翻身, 翻完左邊翻右邊, 仲開始識笑出"卡卡"聲, 真係好得意...但同時亦告訴我, NEW BORN時代已過去, 迎來是INFANT時代, 佢會大得更快, 唔再係一舊飯, 唔再係訓同食..日日佢都有新花款, 學識唔同既招數對付你, 仲會模仿大人既發音..所以以後講野要更小心... 

前陣子帶佢出去商場, 剛巧有攤位$7照一張相, 小比比明明訓著左, 我仲怕佢會扭計, 點知佢一見到相機就識笑...睇來媽咪要想想讓你加入小MODEL行列~~~

小公主愈來愈大, 做到既動作都愈來愈多, 每日都有新既笑點, 呢個就係為人母親的樂趣, 雖然有時真係好忟好辛苦, 但佢一個微笑就足以融化你...由其是當你眼前有2個你一生最愛...咩脾氣都發唔出...

在此希望我3個月大的小羊比比健康成長, 媽咪冇特別大的期望, 只求你開開心心健康快樂, 做個開心小公主就可以...