比媽的孕期日記 【4】 My little Abby's dairy

懷孕期最開心既事係可以真正地當上女皇, 觀察我家準爸爸的每一個無微不至的行為同想法成為了我每日既樂事...我好幸福, 有一個好錫我既老公, 講真, 自2007年我同比爸爸拍拖後一齊住到2012年結婚前, 我地吵架無數, 因為工作, 移民, 金錢, 家庭都有好多不同的想法, 而我地一直冇分手既原因主要係因為我地都係澳洲家人唔係身邊, 又一齊住...就算嘈, 都唔知去邊好, 最後忍忍下又過左...5年來佢唔會俾任何既驚喜, 除了追我的第一份生日禮物, 每年既生日或週年紀念, 佢都懶到腦都唔想用直接問我想要咩, 記得有一年佢竟然覺得我想要果樣野無謂索性唔買, 大吵後先再補返俾我! 佢更加唔識講甜言蜜語, 所謂人蠢得罪人, 佢可以講"你好可愛但你真係生得唔靚"呢種說話!!! 而求婚, 都係等移民批左後覺得應該結婚, 同家人商諒好日子, 係婚前既2個月佢先求既...一個婚禮差不多都係我自己忙同安排, 佢唔係冇幫, 幫少少都算幫忙囉....所以我從來冇要求任何野, 只要佢真心對我就OK, 他給了我一個家, 我就嫁給他...

但係SURPRISE既係自從佢知道自己成為準爸爸後, 一舉一動都唔同哂, 家中所有家務, 飲食, 支出, 工作佢一個人包辦, 當我唔開心時因荷爾蒙發顛佢仲會識睇我心情來氹我, 更會說出"能夠令你開心笑係我一輩子的工作"呢種說話, 我知道作為獨生子女, 佢都係家中小王子, 我99一向都寵慣佢, 任何事情都唔需要佢做, 佢又點會去服侍人, 所以自從我有左佢, 佢既改變真係好令我感動, 特別係佢跪係地上擦地板我問佢點解要擦得咁辛苦, 佢竟然話因為我平時好易病, 所以要確保好乾淨同要消毒, 只要我身體好, 佢工作先冇後顧之憂...成個孕期我喊得比任何時間都多, 但唔係因為身體唔舒服或荷爾蒙影響情緒, 而係因為我覺得自己冇嫁出, 我老公真係好錫我, 令我好感動, 我相信佢唔係一個好男友, 但佢絕對係好老公好爸爸...

係25週時, 因為好好奇比比究竟似我定似比爸, 我地做左一次3D SCAN, 當日比比超活潑, 因為我應承佢我地去食M記...食完先去見靚靚樣, 我一個人去食, 佢仲同我超有交流, 而比爸當日要返工, 所以到左指定時間比爸就係約定既地方等, 我地超興奮同緊張, 因為第一次可以近距離睇到比比既大樣, 點知!! 人地一放個SCAN上肚, 佢就9秒9轉頭唔俾你睇, 我地即刻O哂咀, 掃瞄師係咁搖我個肚, 個得逞妹仲成個頭隊入胎盤唔俾你睇, 連我側身佢都抓住唔放手, 照左成30分鐘, 人地都冇哂辦法, 正常應該點都要照俾錢, 我超失望, 點知, 因為照既過程我同掃瞄師傾計, 知道我同佢個女同年又係今年第一次做媽咪, 加上我做老師同佢傾左好多育兒經, 佢話好想見下調皮比比既大樣, 所以佢免費下星期再幫我照一次, 我真係開心到彈起!!下星期仲有機會...

終於等到下一星期, 今次我地醒左, 唔食飯住, BOOK左一早去照, 比爸不停同比比講請佢食KFC, M記, 牛肉粉....但唔俾樣睇就冇得食...為左令佢郁多D, 我仲食左古古力打底, 去到約定地點, 好期待地訓低等睇, 點知!!!!3個人又係同時見到比比明明係面向外, 但機仔一放上肚佢又9秒9轉面囉...叫都叫唔切!!!激死人啦!!! 爸爸係咁氹佢都冇用, 係照左20分鐘後我地都打算放棄, 掃瞄師姨姨話冇計啦佢咁固執, 唯有下2星期再來照啦, 我心諗, 唔係呀嘛? 仲要來呀, 雖然我都好想, 但唔係幾好意思囉, 掃瞄師姨姨話, 唔緊要架ABBY, 你唔俾我地睇我地今日就唔睇, 但你下次再來, 照到我睇到你為止, 奇蹟既事情發生啦!!!掃瞄師姨姨講完呢句說話準備收機之際, 比比9秒9轉左塊過來, 好似同人講, 唔好呀, 我投降俾你睇啦... 而且仲打開左對眼仔好似望住你講咁, 好得意架...就咁睇比比對眼就似比爸夠大, 咀仔都似爸爸...而面型同鼻仔都似我, 你地覺得呢?

同佢講左2句野佢就合返埋對眼整鬼臉過你...

呢隻古靈精怪比, 爹地媽咪真係冇你辦法...你比媽咪更加百厭同整古做怪呢!!