比媽的孕期日記 【6】 My little Abby's dairy

時間真係好快, 幾日時間我就已經打到第6篇, 最後3星期我真係要好好爭取下要做埋想做既野, 真係唔知比比幾時會突然出爐呢, 呢隻百厭妹今早踢到我個"焗爐"反轉哂左凸又凸...最後我都係冇佢計死死地起身食早餐~~

第6篇既時間應該係比比過左30週啦, 話咁快我就睇唔到自己對腳, 連沖涼我都睇唔到自己"妹妹", 真正係靠著邊摸邊洗, 真係冇陰公, 個身彎低都成問題, 好多日常可以做到好簡單既事都做唔到....包括----

講真, 我真係唔係好慣被人拿住對腳, 但係自己又彎唔到, 好彩比爸都好自願地見到我準備剪時立即抬起我對大腳....真係又尷尬又SWEET....進入32週即係8個月後, 我既身體更加不能自己, 腰酸背痛, 對腳成日麻痺加抽筋, 訓覺時壓住對手又會麻痺醒, 最慘係我本身坐骨移位, 比比愈來愈大就壓住我條神經, 好幾次我仲成個人閃一閃趺返低...真係好驚險!

大臉貓變得愈來愈立體, 我既衫都愈來愈多唔岩著, 有些係3個月時買既大肚衫, 而家都會COOL住個肚, 真係好辛苦, 出街又5分鐘跑一次廁所, 行路"亞下亞下"....做媽咪真係好偉大呢!!!

為左紀念呢個時刻, 本來我一早BOOK左一家澳洲家庭式影樓幫我留下大肚既倩影, 點知佢係前一星期先話要取消哂所有既BOOKING仲要CLOSE DOWN BUSINESS, 追問下先知因為佢媽咪患上CANCER, 老實講, 我唔係唔同情, 但係好多結婚, 大肚同影NB相既人一下子俾佢冼左一獲, 呢D野都係一早BOOK好, 你突然一句唔做就唔做, 人地都唔知急急忙忙邊度搵人影, 有點不負責任囉, 我以後亞洲比較多呢D事發生, 估唔到連鬼佬都信唔過..!!!但亦都係咁, 迫使左比爸係冇辦法下出動腳架去幫我影, 而執相由我自己操刀, 講真, 我又冇學過, 只係上網睇過下點用PS, 點都執得唔靚架啦, 但係馬死落地行, 唔得都要得啦....

呢D相分左2日影, 一日係出面近海既大公園影, 一日係屋企同屋企屋苑後大草地影, 好處係如果急尿可以即刻去, 如果累可以即刻訓低...本來好想買埋泳衣去沙灘影架....耐何我個肚唔聽話, 一到30週後因為肚皮薄大得太快, 比比送左份最大既禮物過我----妊娠紋...

真係要多謝我既小公主送我呢份大禮囉.... 所以沙灘之行只好取消了....

因為肚子太大, 所以出街既機會更加少之有少...唯有....靠奶奶寄俾我既書打發下時間, 然後除左電視就是IPAD同WHATSAPP....

比媽的孕期日記 【7】 My little Abby's dairy

時間轉個眼就過, 呢個時候又係倒數5星期既時候, 作為一個10月同11月之間預產既媽咪, 心情愈來愈緊張, 2邊既媽媽會每日都有報喜消息, 令我日日都唔知比比究竟幾時要出來...35週的比比已經去到高峰成44吋大肚, 比起我出嫁時多左成16吋....16吋呀!!!

大家可以想像到我163既身高陀住個巨肚有幾咁辛苦呢....真係陰公....雖然我對腳仲可以行得好快, 但係我既肚又唔準我行咁快, 只要自己一唔注意行快左, 個肚就自然地宮縮肚硬下墜....然後下面好吉要打開咁, 我就只好放慢或即時企係度唔郁....因為行動不便又患上妊娠糖尿, 真係好感謝我老公比爸每個星期買定新鮮肉魚同菜準備我一星期既營養餐, 咁佢返工時我只要成包放入OVEN煮個紅米飯就食得...

已經過渡左5星期既SMART EATING, 血糖讀數都十分靚仔...主要都係5-7點內...都算係咁, 個人冇咩野做, 又上網淘寶下, 以前我淘親都係小東西, 仲係好多冇用既小東西, 衫褲鞋襪, 裝飾等....家下打開淘寶全部都係迷你貨品, BB衫, BB裝飾, BB用品等等....所以話每個人生旅程都會有好大既轉變...家人同朋友們送了好多衫裙俾比比, 我地根本唔需要再買, 所以作為媽咪既我, 最後給自己小公主送上幾對小鞋子....好得意呀!!!

生女真係好鬼破產...女仔可以著裙著褲...顏色又百搭, 一見靚款我就忍唔到手...唔止我, 婆婆都忍唔到手, 細個時我媽咪好鍾意同我扮靚, 要成個公仔咁出街, 冇想過今日既MINI ME都得到婆婆既熱心...

婆婆仲要為左比比周圍問人唔同既BB用品, 仲識去MOTHER CARE行..真係利害!!

另一邊箱, 怕死我係屋企會冇野食既比爸, 一去到SUPERMARKET就控制唔到自己...望到呢個雪櫃都知我唔會餓死係屋企啦~~~

比媽的孕期日記 【5】 My little Abby's dairy

平平穩穩捱到28週...醫生要求我做一個Glucose screening test, 係要測試出身體既胰島素工作效率, 一般呢個TEST會比較易中招, 而中招既孕婦有1/3會係真係患上妊娠糖尿病, screening test係唔需要戒口同空肚既, 正常去到就可以, 護士會俾一支(香港係一杯沖出來既)既糖水俾你, Screening test既葡萄糖含量為50g

係澳洲比較幸運, 因為呢支野係凍既, 而且新鮮未開封仲有少少汽, 比香港既暖水沖粉好飲好多, 護士會要求你10分鐘內飲完, 因為個人一下子吸收左咁多糖份個人會WING WING地...所以佢地唔建議你行來行去, 而且你行來行去亦會令糖份揮發, TEST出來唔準...所以佢建議你坐定定等一小時, 而一小時後再抽血化驗篩選...

十分開心地, 我被篩選出來有機會果一批....所以係30週時我需要再作一次正式既測試, 今次既葡萄糖含量為75g, 而且需要空腹12小時, 帶住超餓既身體去到medical centre, 先抽第一次血, 然後10分鐘飲哂呢支野..

同樣地呢支野有汽同凍既, 但係加到75g真係好難接受, 支野係超級無敵甜!!! 聽說很多香港的準媽媽飲完會忍唔住嘔或吐返出來, 我要頂頂頂頂頂!!!飲完呢支野, 護士要求你邊度都唔好去, 係度等2小時, 而每小時會抽一次血作化驗, 抽完第3次血就可以走...主要係測試你空腹時既含醣量, 再以每一小時既消耗速度來得出體內胰島素工作效率, 如果慢, 即係血糖數高企, 就是中了妊娠糖尿病的準媽媽啦....

一星期的等待...真係令人茶飯不思, 但係打定輸數下, 我總要食返餐好既先...有甜食甜啦!!!

一星期死期到...我成為了孕婦中的那患上妊娠糖尿病的20%準媽媽, yeah!! 醫生即時寫信將我轉介醫院, 由醫院糖尿專科去follow我既case...同一星期我就安排左到醫院上堂, 主要係講解下咩叫妊娠糖尿病gestational diabetes同俾份餐飲example俾你自己想點食就點食...順便送埋部機俾你

麻煩你一日督4次, 空腹, 早餐後2小時, 午餐後2小時, 晚餐後2小時....記錄低俾醫生參考, 空腹不得超過5,而餐後2小時不得超過7, 否則醫院會要求幫你注射胰島素...由這天開始, 我就過著營養餐的生活..

當然, 我都有破戒既時候, 始終係孕婦, 有時想食食唔到好辛苦的...但我會睇住督手指讀數做人...如果食完唔超, 我就知下次可以再食...如果超左少少, 我會下次減返份量, 如果超左2點以上, 我會唔敢再食...其實妊娠糖尿病一點也不可怕, 它不是一種病, 只是因為懷孕時荷爾蒙影響胰島素工作減慢令醣份消耗減慢, 所以會要求孕婦少食多餐, 咁樣就可以俾時間身體慢慢消耗, 係茶餐時我會食下餅, 蛋糕, 零食....中秋時就食左半隻月餅都冇事, 所以, 妊娠糖尿媽唔好灰心, 你唔係病, 唔需要點樣去戒口, 但係要食得聰明係一個學問, 我由30週開始到今日37週, 醫生最怕既就係醣份影響BB會令佢變成巨B, 但係我既smart eating冇令BB太大仲要剛剛好SIZE非常健康, 到今日37週佢都只係2.9KG, 係一個正常重量健康既小B女..

所謂"Smart Eating"..要記得既係你要消耗既係醣唔係糖..營養師一般會叫你跟一份1800卡路里既餐單, 呢個係最保險既食法, 但係如果你真係想食其他野, 好似我咁, 都冇所謂, 但記得....澱粉, 糖份, 肉類等...都會轉化為醣, 特別係澱粉最難消化, 所以澱粉一定要少, 最多只好大半碗白飯或一平碗紅米飯, 如果食薯仔或番薯芋頭等代替, 就要戒米飯, 呢d應該都係常識, 而老火湯可以飲一大碗, 但渣=澱粉/肉量, 自己控制, 肉呢, 餐單會叫你食40G左右定半碗咁上下, 而我既食法係無限, 但無限唔代表你食到飽當冇事, 肉同菜既比例必須為1:2, 食左幾多肉, 就要補返幾多份菜, 瓜菜以清炒少油或白焯為準, 咪走去食成碟椒絲腐乳通菜都當青菜呀, 瓜菜同清菜湯係無限既, 如果覺得半碗飯唔夠, 就狂食瓜菜同飲湯, 保證你飽到嘔.....買零食時想知道邊樣會令你降糖慢, 唔係留意sugar - 糖份, 而係留意Carbohydrates - 碳水化合物, 呢個先係令你體內轉化產生醣份既元兇, 其實要捱, 都係10星期左右既事情, 為左自己健康, 為左BB, 食得聰明食得健康....其實都唔算係犧牲呢~~