因為公公婆婆分開左, 所以我由細到大都係同婆婆住由婆婆一手湊大, 而我公公係比較傳統既一個人, 雖然佢地分開, 但係我每年總會見公公幾次, 最印象深刻當然係每年既農曆初一, 因為一定要一早到公公屋企同佢拜年, 真係一早, 大約8-9點, 對住一個小朋友來講真係惡夢, 所以我好唔鍾意去公公度, 而且佢好嚴肅, 平時都唔多講野, 一開口就好多道理同教訓人..小時候因為媽咪唔理公公反對嫁左俾我爸爸(當然最後離婚收場)生左我, 係我小時候既記憶中好少有我公公出現, 只記得佢好鬼惡...如果食飯拿碗拿筷子拿得唔好, 公公會一野掃埋來, 而且會一直望住你, 所以自細我同我班表兄弟姐都好怕公公...而我媽咪係唯一既女, 我當然係唯一既外孫女, 更加嚴格..
上中學後更唔鍾意去公公度, 因為佢好煩, 好多道理, 相比婆婆, 我婆婆由細就縱我又溫柔, 完全係2個角色, 中學時期, 每年得果2日可以出夜街, 即係可以過12點果隻, 一日係聖誕, 一日係年宵, 細個唔乖, 成日同班同學仔圍威喂, 要帶到成隻耳仔都係耳環, 噴到個頭紅色紫色先會出去玩, 差不多玩到早上先返屋企, 7-8點就要死返起身, 明知隻耳仔發炎都要除左對耳環整損哂, 快快洗返好個頭, 著到賴係斯文咁去公公屋企拜年...係我最唔想做既事....
讀完中5, 因為成績又唔太好, 媽咪決定送我去英國讀書重新來過, 聖誕時返香港同公公食飯, 佢竟然破天荒地俾左成萬利是我叫我好好讀書, 要向2個舅父學習, 仲打左一條大金牌頸鏈俾我, 話如果係外國有咩事, 都叫手上有D野可以旁身, 當時我剛剛17歲, 突然覺得原來公公都有關心同錫我既一面...係咁多年既海外讀書生涯中, 每年我都會返香港同公公食飯, 睇住佢一年比一年老, 一年比一年更似一個小朋友, 開始會撒嬌, 會講笑, 有時仲要人氹, 有時佢會唔記得左我原來已經大個左, 聽到媽咪話我入大學, 畢業, 佢會好神奇原來我已經咁大個啦...
記得我大學畢業返到香港探佢, 佢問我有咩計劃, 希望以後點, 當時我話我想繼續進修, 我想做老師, 佢解釋左好多唔同方面俾我知, 仲慢慢同我分析, 教我點做人, 自己條路選好唔好變, 而我呢個唯一既外孫女, 亦係唯一外國大學畢業生, 所以佢更加錫我, 會同我玩同我講笑, 完全忘記了小時候對公公既印象..
2012年, 我準備嫁為人妻, 公公說要來睇我出嫁, 因為我係佢唯一既外孫女, 可惜佢突然病了, 差點就一命嗚呼, 還好最後冇事, 但家人都唔放心佢來到澳洲咁遠睇我, 而且結婚好多野攪, 都冇時間陪佢周圍玩, 所以我地約定了等下次, 一定會好好陪佢係澳洲不同省份玩一轉...就這樣, 呢個連公公都唔記得歲數既外孫女就嫁為人妻了...回到香港後, 第一時間當然帶著比爸到府上跪地倒茶俾公公, 然後用了15分鐘來解釋做人既道理同婚姻背後...我地大家都笑了...
留在香港過年, 今年是見得最密的一次, 唔知公公係唔係有預知, 佢突然好多地方想去, 除了年廿九食完團年後, 初一又再一次見面, 聽說比爸會煮一手好菜, 所以今年既菜色由我同比爸負責煮起12人份量, 公公一路係旁邊望住, 又笑, 好不溫馨...
食完飯後, 佢仲話要親手撈個鮮果沙律食, 話今早新鮮買既水果酸酸甜甜我一定鍾意食...
過左幾日, 佢突然又想起以前識人係鯉魚門, 話好多年冇去過, 想帶埋我地一齊去睇下...
臨返澳洲前, 我仲打電話同公公傾計, 約佢飲茶, 佢本來有事做都推左來見我....一餐茶入面, 佢不停同比爸傾計, 大家講下笑, 佢仲應承我快快攪掂手上既工作, 就來澳洲等我帶佢玩...4月份當佢知道我有左比比時, 佢仲好開心, 好期待希望下年我返去又多個小朋友, 我長大了做人媽媽了.....他感到很安慰...
10月9日, 因為之前冇做手術既腫瘤發病, 佢昏倒入院, 當醒來交代了所有事情, 他安詳地走了...而我, 因為大肚冇辦法即時飛返去, 更見不到最後一面...但我知道公公會在天上一直看著我同比比的...
希望公公一路好走, 你永遠是我最尊敬及愛錫的公公..雖然以後我地都冇得再見面, 但你永遠在我心裡..
沒有留言:
發佈留言